ဒေါပုံမီး

မနေ့က ဒေါပုံမီးအကြောင်း ကြားရတော့ ကျနော် စိတ်မကောင်းပါဘူး ဒီပေါ်ပြူလာ ပလပ်စတစ် စက်ရုံက ကျနော် အလုပ်လုပ်ခဲ့ဘူးတဲ့ စက်ရုံပဲ ဒီစက်ရုံက ကော်အရည်ကြိုစက်၊ ကော်ကြိတ်စက်၊ ကော်သောက်ရေခွက်၊ မုန့်ထည့်ကော်ပန်းကန်ပြား၊ စသဖြင့် ကော်နဲ့ပတ်သက်တဲ့ ပစ္စည်းများကို ထုတ်တဲ့စက်တွေရှိပါတယ်။ ပေါ်ပြူလာ ဆိုတဲ့ တံဆိပ်နဲ့ ထုတ်လုပ်တဲ့ စက်ရုံပါ။ ကုန်ချောရဖို့ကို နော်ဆယ်အိုး တွေမှာ ကွိုင်တွေပတ် ကော်စေ့တွေကိုထည့် လျှက်စစ်မီးနဲ့ အပူပေးပြီး မို တွေထဲ (ပုံစံခွက်ထဲ) ကို ညစ်ချရတယ်။ အရမ်းကို ပင်ပန်းတယ် နွေဘက်ဆို ပူလွန်းလို့ ပိုပင်ပန်းတယ်။ ၀ါယာရှော့ ဖြစ်ပြီး ဓါတ်လိုက်မှာ ကြောက်ရသလို၊ မီးဘေးအန္တရာယ်ကိုလည်း ကြောက်ရတယ်။ အန္တရာယ်သိပ်များတဲ့ အလုပ်ပဲ။ မြောက်ဥက္ကလာမှာ ဆိုရင် သူ့လက်ခွဲတွေ အများကြီးရှိတယ်။ မြို့ထဲက ၁၅ လမ်းမှာဆို ရင် ကုမ္မဏီရှိတယ်။ သူဌေးက တရုတ်စပ်တွေပါ။ သဘောကောင်းတယ်။ အများအားဖြင့် နယ်တွေဘက်က အလုပ်သမားတွေကိုပဲ ထားတယ်။